娛樂資訊

撰文 娛圈小燈    版面設計 BBKin   相片提供 新時代電視

《聲夢傳奇》自去年播出後引起極大迴響，吸引了一班「鐵粉」每星期追看比賽進程，節目也為香港樂壇帶來許多新血。憑著青春熱血，一眾「聲夢」學員在2021年創造了不少傳奇。完成賽事後不足一個月已初試啼聲，舉行的《聲‧夢飛行First On Stage演唱會》因反應熱烈一再加場，最後一共開了四場。踏入2022年，傳奇故事延續下去，《聲夢傳奇》在《萬千星輝頒獎典禮2021》連奪兩獎，除了「最佳綜藝節目」，主題曲《造夢時學過飛行》亦獲頒發「最受歡迎電視歌曲」。人氣爆燈的「聲夢」學員，在專業導師加持下，加入娛樂圈後風頭更是一時無兩。其中炎明熹Gigi、姚焯菲Chantel及鍾柔美Yumi粉絲年齡層橫跨幾代，三歲小朋友到八十歲的長者都封她們為偶像，不但成為廣告界新寵兒及亮相綜藝節目，更「踩過界」拍劇，成為現時於新時代電視1台熱播中《青春本我》的主幹。

《青春本我》是香港少有的校園青春歌舞劇，除了《聲夢》學員總動員參與拍攝外，《盛‧舞者》星級導師「麥Sir」麥秋成亦帶領成員加入劇組！集歌舞於一劇的《青春本我》，還會與大家講「心」。故事講述一班看似無憂無慮中學生，其實各自暗藏「不能說的煩惱」，面對各種來自家庭、學校、朋輩間的困擾，當中更有涉及校園欺凌等等的社會議題。同學們在JW王灝兒飾演的輔導心理專家Miss Wong幫助下，以正面的態度去處理種種困難，勇敢面對。《青春本我》另一亮點，便是邀請了一班演技出神入化的前輩加盟，包括王祖藍、鄧梓峰、C君、姜皓文、陳煒，以及在幕前首次飾演夫妻的「真‧夫妻」錢嘉樂與湯盈盈。大家只要逢星期六晚上8:55，鎖定新時代電視1台，就可以一齊回歸校園，重拾最青春熱血的中學時代！

本刊今期邀得Gigi, Chantel及Yumi三位青春人氣偶像進行獨家專訪，暢談出道至今的感受及背後不為人知的故事。

炎明熹外表冷酷，被賜名「火星女神」。她台風成熟，在《聲夢傳奇》不但被視為頂頭大熱，最後更以「由頭帶到尾」的姿態，成為三料冠軍，勇奪《專業評選大獎》、《觀眾熱選大獎》及總冠軍《傳奇新星》，成功吸納不少歌迷。年僅16歲的Gigi，也許人生歷練不多，但演繹歌曲的情感卻非常豐富及細膩，比賽時翻唱天后林憶蓮經典歌曲《沒有你還是愛你》一唱成名，影片上載約兩星期，點擊率已衝破100萬。校長譚詠麟及歌神張學友亦點名力讚，有前輩加持，Gigi前途真是無可限量！而首支派台歌《真話的清高》亦不負眾望，演繹富有層次，情感輕重拿捏得恰到好處，大多數觀眾都以「超齡唱功演繹」去評價Gigi的出道之作，不過對此她另有看法：「其實我又唔太覺得自己係超齡嘅唱功，因為天外有天，人外有人！我希望會一直進步落去，唔好停留，希望今日嘅自己會好過聽日嘅自己，因為不進則退，希望大家每一日都見到我有少少嘅進步，唔同嘅變化。」但對於一個從未嘗過情為何物的少女而言，要代入合適的情感，唱出歌曲的神髓確實有一定難度，因此打造歌曲的製作團隊功不可沒：「其實我一開頭都唔係好理解歌詞嘅內容，係監製韋景雲先生，同填詞人黃厚霖先生，就同我講咗個故事，之後我就開始明白。」所以要製作一首成功的「唱將式情歌」，曲詞創作者與歌手的溝通是非常重要的！

《真話的清高》成績亮麗，不得不提一班「GI炎粉」的應援攻勢。除了巴士站巨型燈箱廣告及巴士車身廣告外，更有粉絲把餐廳打造成Gigi限定時主題 Cafe「GI星球」。同時，他們亦為偶像開設網上頻道「明GI台」，親臨Gigi工作現場，採訪及拍攝幕後花絮，記錄她出席的大小活動。當受萬人注目的耀眼新星回到學校，Gigi的校園生活與其他中學生並沒有差別：「關注度係多咗，亦都會有一D新入學嘅小師妹會搵我，等我攞簽名，但係同一D喺校園相處耐D嘅朋友，佢哋就唔會有太大改變。因為喺學校，我都係做番學生會做嘅嘢。」但學業和事業兩頭燒瘋，Gigi想喘口氣亦有點難：「其實壓力多多少少都會有，但係我會慢慢去搵方法去舒緩壓力。」為自己定下一個明確的目標，便是推動繼續前行的最大動力：「目標就係做好自己，保持初心，我覺呢個係最重要。無論之後嘅路係點，都係要靠做好自己先，因為我知道喺呢條路上面，應該會有好多唔同嘅機會，一定要清楚明白，記得自己嘅初心係乜嘢！」毋忘初心，再加上熱誠，Gigi在演藝路上不斷獻出人生第一次：「最大挑戰係自己未嘗試過嘅嘢。因為如果你做過嘅嘢，你大概都會有個底，但係當你未嘗試過做嘅嘢，你就有D會無所適從。」首次參與劇集演出的Gigi，有幸獲得好戲之人姜皓文及陳煒耐心指導，並飾演其父母，讓演戲初體驗十分難忘：「完咗成個《青春本我》慶功宴食飯時最難忘。因為遇到嘅人和事都對我非常之好，我非常唔捨得佢哋，之後我就同工作人員、導演、監製一齊影相。因為唔想忘記佢哋！」

姚明焯菲Chantel以15歲之齡，成為《叱咤樂壇頒獎典禮》及《新城勁爆頒獎禮》最年輕的得獎女歌手。Chantel在《聲夢傳奇》翻唱經典金曲《戀愛預告》好評如潮而人氣急升，羞澀又甜蜜的演繹，成功圈粉無數，成為被大家疼愛的小公主！此影片更於2021年度一個網絡影片平台的「香港10大熱門音樂影片」排行榜中，登上第6位，亦是唯一上榜的女歌手，絕對是2021年樂壇另一令人驚艷的潛力股！Chantel雖然最終沒有在《聲夢傳奇》比賽中奪冠，卻贏盡人氣！比賽以來一直甚有觀眾緣，兼深得評判和導師喜愛的她，從《聲夢》畢業後，推出的第一首派台歌《原來談戀愛是這麼一回事》亦繼續廣受一眾「小菲象」及樂迷愛戴，短短兩個月時間，網上收看的點擊率已突破2百萬次。去年底Chantel正式加入樂壇成為歌手，同時亦揚言絕不會放棄學業，兩件事必須共存：「學生歌手兩個身份我都好鍾意，但係如果真係要我揀一個嘅話，我覺得都係歌手。雖然我覺得做歌手之前一定要讀好D書先。我覺得歌手係另一個世界，因為之前我嘅眼界冇咁闊，但係入咗呢個圈子之後，我識多咗好多唔同嘅嘢，知識多咗好多！」

《原來談戀愛是這麼一回事》Chantel唱出愛情美夢破滅的失落感，但歌曲MV中的愛情戲，卻交由兩位專業演員擔當。想要一睹她以演技去揣摩少女的愛情世界，扮演情竇初開的中學生，難明白自己的感情世界，就一定要留意《青春本我》：「拍劇對我嚟講係非常之新鮮，食飯同唔使拍攝嘅時候都好難忘，因為唔使拍攝嘅時候，我哋會係咁傾偈、唱歌，雖然NG都係一D難忘嘅回憶。而最大挑戰就係其實有好多細微嘅動作，例如眨太多眼，有時會唔覺意撥頭髮，或者有D表情唔覺意做咗，呢啲都係好大嘅挑戰，因為喺鏡頭下可以捕捉到任何一樣好細微嘅嘢。」今次Chantel在劇中挑戰「師生戀」劇情，暗戀由朱敏瀚飾演成熟貌好的中文老師。劇情講述Chantel寫情信示愛，卻因為意外洩漏至學校秘密群組，慘遭同學恥笑，之後大受打擊，躲起來哭。粉絲隔住熒光幕亦感受到小公主的痛，「小菲象」以行動安撫Chantel角色的痛，在網上洗版式地肯定其首次參與劇集的演出！從比賽至今，不足一年的時間，Chantel在生活上急速成長，迎來人生很多的第一次，但看似膽小羞澀，需要被人憐愛的她，心底深處最想嘗試的東西卻與她的外表來了個大反差：「我太多嘢想試，如果你夠膽去做，降落傘呢D可能好恐怖，但係我覺得壯下膽都幾好。同埋我發覺我未試過入鬼屋，呢樣嘢我真係好想試吓！」Chantel外表看似柔弱，實則內心卻剛強無比，更一直視偶像BLACKPINK為學習對象：「佢哋(BLACKPINK)非常非常之勤力，抗壓能力係非常之高，我覺得我未去到呢個水準。所以宜家我好勤力咁練每一樣嘢，佢哋個種我死都唔會放棄嘅精神，一直都有，所以我覺得非常好，好想向佢哋學習。」

鍾柔美Yumi有「翻版鍾嘉欣」之稱，從小對表演充滿熱誠：「我細細個自己就好想上訓練班，例如好似喺『家燕媽媽藝術中心』，乜嘢都可以嘗試，跳舞、演戲、唱歌，乜都有，媽咪都好支持我。其實我自己都好想試下搵出一條適合自己嘅路。」所以自6歲起至今，Yumi已參加了逾百場的歌唱比賽，不但舞台經驗豐富，更拍過無綫的劇集，是御用童星之一，富有錄影經驗，因此與其他《聲夢傳奇》參賽者比較，表現更加淡定，一直是大熱學員！比賽時唱跳亞洲舞王郭富城的《狂野之城》，盡顯既狂野又性感的一面，成功俘虜一眾「米粉」的心，即時人氣急升。著名音樂人兼《聲夢傳奇》評判張佳添更高度評價，直指Yumi是女版郭富城，實力亦能勝任成為鄭秀文的接班人！

Yumi有過做童星的經驗，演出《青春本我》時演技亦被睇高一線：「其實之前細細個都係參與好少部份嘅劇集，可能係做一D小小的角色，例如做人哋個女，或者係一班小朋友、同學，咁同《青春本我》當然有好大分別，因為首先《青春本我》呢個劇，係屬於我哋《聲夢》同埋《盛•舞者》一班人，屬於我哋嘅故事。不過，之前嘅經驗都會幫到我，令我知道拍攝環境係點，有D乜嘢做，導演會講D乜。其實都讓我有個概念知道乜嘢係拍戲。」《青春本我》作為《聲夢傳奇》後衍生的劇集，參與的演員，除了要演得，更要唱得，所以對於已經擁有豐富的幕前及舞台經驗的Yumi來說，今次劇集的拍攝也是一個十分難忘的新體驗：「導演俾咗一個好有挑戰，同埋幾難嘅角色俾我－一個被欺凌嘅女仔。雖然自己都有經歷過類似嘅情況，但就冇咁大件事。其實係好難投入，因為有一首插曲要我唱，咁就要韞住我喺間房度，情緒就要比較爆，又要喊，又要唱住隻歌嘅歌詞，最難忘就係唱住呢隻歌去發洩情緒。」有了今次邊演邊唱的經驗，Yumi邁向全能藝人的目標又踏前了一步。

青春的烙印

三位平凡的中學生，因為報讀STARS Academy，成為《聲夢傳奇》學員，一同行走在青春的軌跡上，歡笑過、哭過，現在更搖身一變成為青春偶像。《聲夢》時期彼此相處的點點滴滴，已經在她們青春的心靈留下深深的烙印。

Gigi：同Chantel最深刻嘅一件事係一齊唱《遇見》，因為嗰隻歌好啱佢唱，都係因為呢次嘅合作，同佢嘅關係更加親密。同Yumi係一齊跳舞，因為令我學到好多嘢！

Chantel：講到Gigi第一樣嘢我會諗到係唱《遇見》，因為呢次係我哋真真正正嘅合作，唔計輸贏，嗰段時間好開心，頭先我啱啱先至再聽番，呢段回憶好美好。同Yumi有太多回憶，其中一個係同Yumi一齊去放狗，嗰個係拍攝嘅一個日子，咁佢就帶咗兩隻狗仔一齊去，我本身好鍾意狗，再加埋Yumi就YEAH，好開心！！

Yumi：《聲夢》一開頭我係先認識Chantel，之後就好Friend，我哋好鍾意影相，同自拍。而Gigi佢好願意同我分享，佢係一個好高要求嘅人，表演完都會問我點，我都好願意聽同分享。